Алматыда Ө. О. Оспанов атындағы Қазақ топырақтану және агрохимия ғылыми-зерттеу институтының 80 жылдығына орай «Климаттың өзгеруі жағдайында топырақ ресурстарын тұрақты басқару» атты халықаралық ғылыми-тәжірибелік конференция өтті.
Іс-шараға Қазақстан мен шетелден 140-тан астам ғалым, мамандар қатысты.
Олардың қатарында АҚШ, Германия, Қытай, Чехия, Ресей, Әзербайжан, Қырғызстан және Беларусь елдерінің жетекші сарапшылары болды.
Қазақстан ғылымын елдің жетекші ғылыми-зерттеу институттары мен университеттерінің белгілі ғалымдары – Темірхан Айтпаев, Шолпан Бастаубаева, А. Саданов және басқалар таныстырды.
Конференция тәжірибе алмасуға және топырақтану, агрохимия, топырақ экологиясын тұрақты дамытуға арналған келісілген ұсынымдарды әзірлеуге тиімді алаңға айналды.
Жиында климаттың өзгеруі жағдайында топырақ ресурстарын ұтымды пайдалану, топырақ экологиясы мен биологиясы, топырақтанудағы цифрландыру тақырыптарында 45 пленарлық және секциялық баяндама тыңдалды. Сондай-ақ тұзданған топырақтарды мелиорациялау мен басқаруға қатысты инновациялық шешімдер ұсынылды.
Әлемдік сын-қатерлерге ерекше назар аударылды. UNCCD деректеріне сәйкес, әлемдегі жерлердің шамамен 33%-ы орташа немесе күшті деградацияға ұшыраған, жыл сайын 24 млрд тоннаға дейін құнарлы қабат жоғалады.
Қатысушылар топырақтану саласында халықаралық ынтымақтастықты кеңейтуді, ашық ғылыми коммуникацияны дамытуды және ғылым, бизнес пен мемлекеттің үйлесімді іс-қимылын қолдады.
Ұсынылған практикалық шаралардың қатарында: топырақтың цифрлық карталарын және топырақ денсаулығы индексін жаңарту; көміртек пен ылғал мониторингін кеңейту; тұздану, эрозия және шөлейттенумен күрес бойынша инновациялық шешімдерді енгізу; өлшемдерді стандарттау және агроклиматтық аймақтар бойынша технологияларды тарату бар.
Ұлттық аграрлық ғылыми-білім беру орталығының ғылым және халықаралық ынтымақтастық жөніндегі басқарма төрағасының орынбасары Максим Сутула атап өтті:
«Бұл қадамдар шаруалар үшін тәуекелдерді азайтуға, азық-түлік қауіпсіздігін нығайтуға және топыраққа елдің стратегиялық капиталы мәртебесін қайтаруға мүмкіндік береді. Басты мақсат – Қазақстандағы әр гектар жер тиімді әрі тұрақты жұмыс істеуі».
