Тоқаев: біз елімізді отандық сүт өнімдерімен қамтамасыз етуге толық көшуіміз керек
Қазақстан президенті Қасым-Жомарт Тоқаев Солтүстік Қазақстан өңірінде мал шаруашылығы өнімдерін өндіру көлемін ұлғайту үшін барлық мүмкіндіктер бар екенін атап өтті. Бұл туралы Мемлекет басшысы «Қызылжар-сүт» фермасына барған кезде айтты, деп хабарлады Ақорданың баспасөз қызметі.
Президентке сауу цехы мен бордақылау алаңы көрсетілді, сондай-ақ осы кешенде қолданылатын сүт өндіру технологиясы таныстырылды. «Қызылжар-сүт» тауар-сүт фермасы жұмысының бірінші кезеңі 2020 жылы іске қосылды. Өткен жылы 366 млн теңгеге субсидия бөлініп, Германиядан симменталь және Гольштейн тұқымдарының басы әкелінді. Ферма 60 жергілікті тұрғынды тұрақты жұмыспен қамтамасыз етіп отыр.
Қасым-Жомарт Тоқаев ауыл қызметкерлеріне адал еңбегі мен елдің дамуына, халықты азық-түлікпен қамтамасыз етуге қосқан елеулі үлесі үшін алғыс білдірді.
«Біз мұндай өндірістерді қолдайтынымыз сөзсіз. Әлеуметтік-кәсіпкерлік корпорациялар арқылы жеңілдетілген несиелеу өзін ақтады. Қаржыландыру тұрғысынан бұл жерде ешқандай проблемалар болмайды. Біз бүкіл ел бойынша отандық сүт өнімдерімен өзін – өзі қамтамасыз етуге толық көшуіміз керек», — деп атап өтті Мемлекет басшысы.
Президент агроөнеркәсіп кәсіпорындарының басшыларымен және жұмысшылармен әңгімелесті. Олардың айтуынша, мемлекет тарапынан жан-жақты қолдау нәтижесінде Солтүстік Қазақстан облысында мал шаруашылығын дамыту жаңа серпін алды.
Мемлекет басшысы облыс әкімшілігіне жаңа фермаларды іске қосу және қолданыстағы кешендердің қуатын арттыру жолымен сүт шаруашылығын одан әрі дамыту жөнінде тапсырма берді.
