Қазақстан Ауғанстанға $4 млн-ға ұн жеткізеді
Премьер-Министрдің орынбасары – Қазақстанның сауда және интеграция министрі Серік Жұманғариннің Ауғанстанға сапары аясында Кабулда қазақ-ауған бизнес-форумы өтті. Қазақстан тарапынан оған тамақ өнеркәсібі саласындағы экспорттаушы кәсіпорындарының 18 өкілі (ұн, макарон, кондитерлік өнімдер, сусындар, сүт өнімдері) қатысты. Бизнес-форум алаңында кәсіпкерлер Ауғанстанға сомасы $4 млн-ды құрайтын ұн жеткізу туралы келісім жасады, деп хабарлайды basagro.kz.
Бизнес-форум алаңында Ауғанстанда Қазақстан сауда үйінің ашылғаны туралы хабарланды, негізгі кеңсе Герат қаласында орналасатын болады.
Сауда үйінің негізгі міндеттері – екі ел арасындағы сауда-экономикалық қатынастарын жәрдемдесу және жандандыру, Қазақстан мен Ауғанстан арасындағы тауар айналымын ұлғайту, аймақтық сауда-экономикалық, телекоммуникациялық, көлік және логистикалық байланыстарды дамыту, аймақ елдерімен сауда жасау үшін Ауғанстанның транзиттік және шекара маңындағы әлеуетін пайдалану, Қазақстан экономикасына инвестициялар тарту.
Іс жүзінде Қазақстанның сауда үйі Қазақстан мен Ауғанстандағы «B2B» форматындағы іс-шаралар ұйымдастыруды қамтамасыз ете отырып, қазақстандық және ауғандық іскер топтар арасындағы платформаға айналуға арналған. Ол үшін оның базасында экспортталатын отандық тауарлар мен қызметтер, сауда саласындағы заңнама, даму перспективалары мен проблемалық сәттерге маркетингтік зерттеулер мен талдау жүргізу, қазақстандық және ауғандық іскер тортарға ұсыныстар әзірлеу және өзара іс-қимылдың басқа да мәселелері бойынша консалтингтік орталық құрылатын болады.
