Бақылау-Қадағалау органдары бизнес өкілдеріне есеп берді
Извините, этот текст доступен только на “Қазақ тілі”.
Кәсіпкерлік кодексінің 131-1 бабына сәйкес, бүгін облыс әкімінің орынбасары Ардақ Зебешевтің төрағалығымен бақылау және қадағалау органдарының бизнес-қауымдастық алдындағы жыл сайынғы бірыңғай есеп беру күні өтті. Бұл іс-шараның басты мақсаты – кәсіпкерлік субъектілері мен мемлекеттің өзара іс-қимылын жақсарту, заңнама талаптарын бұзудың алдын алу, сондай-ақ кәсіпкерлердің құқықтық сауаттылығын арттыру, деп хабарлайды BasAgro.kz.
Маңызды шараға құқық қорғау органдары, мемлекеттік бақылау мен қадағалау органдары, жергілікті әкімдіктер, сондай-ақ бизнес өкілдері мен «Атамекен» өңірлік кәсіпкерлер палатасы қатысты. Сонымен қатар, санитариялық-эпидемиологиялық бақылау, төтенше жағдайлар, экология, өнеркәсіптік қауіпсіздік департаменттерімен қатар, облыстық бақылау жөніндегі басқарма басшыларының 2024 жылдың 8 айындағы есебі тыңдалды.
2024 жылдың 8 айында мемлекеттік органдармен кәсіпкерлік субъектілеріне 1311 тексеру тағайындалып, нәтижесінде 894 заң бұзушылық анықталған. Сонымен қатар, бизнеске 4 заңсыз тексерулер тағайындалып, 98 профилактикалық бақылау жүргізілген. Есеп беру барысында бизнес өкілдері білім беру саласында мектептегі тамақтану, фармацевтика саласындағы мәселелерге баса мән беріп, «Атамекен» кәсіпкерлер палатасымен бірге өз ұсыныстарын білдірді.
Есеп беру барысында талқыланған басты мәселелердің бірі – бизнес өкілдерінің құқықтық сауаттылығын арттыру және кәсіпкерлік субъектілері мен бақылау органдары арасындағы өзара іс-қимылдың тиімділігін арттыру. Бизнес өкілдері өз тәжірибелерінен мысалдар келтіріп, заңнама талаптарын түсіну мен оларды сақтауда кездесетін қиындықтарды атап өтті. Олар сондай-ақ, бақылау және қадағалау органдарынан өзара іс-қимылды жеңілдету және әкімшілік кедергілерді азайту жөнінде нақты ұсыныстар білдірді.
Сонымен қатар, жиын барысында кәсіпкерлер білім беру саласындағы мектептегі тамақтану және фармацевтика саласындағы мәселелерді де көтерді. Олар бұл салаларда да бақылау мен қадағалауды күшейту қажеттігін атап өтті, себебі бұл бағыттарда да заң бұзушылықтар жиі орын алатынын айтты.
Жиын қорытындысы бойынша, облыс әкімінің орынбасары Ардақ Зебешев бизнес өкілдері мен мемлекеттік органдар арасындағы диалогты нығайту қажеттігін және кәсіпкерлік субъектілерінің құқықтарын қорғаудағы жұмысты күшейту қажеттігін атап өтті. Ол бақылау және қадағалау органдарына кәсіпкерлердің заңды құқықтарын сақтау және әкімшілік кедергілерді азайту жөніндегі жұмыстарды жалғастыруды тапсырды.
Бұл іс-шара облыстағы бизнес өкілдері мен мемлекеттік органдар арасындағы өзара түсіністік пен сенімділікті арттыруға бағытталған маңызды қадам болып табылады. Есеп беру күні кәсіпкерлік субъектілері мен мемлекеттік органдардың бірлесіп жұмыс істеуі арқылы заң бұзушылықтардың алдын алуға және бизнес ортаны жақсартуға мүмкіндік беретін тиімді алаңға айналды.
