Көктемнің алғашқы шуақты күндері Түркияның оңтүстік жағалауын тек демалыс орны емес, әлемдік спорттың нағыз қайнаған орталығына айналдырады.
Жерорта теңізінің інжу-маржаны саналатын Анталия өзінің жұмсақ климаты, сан ғасырлық тарихи мұрасы және су мен тау спортына арналған шексіз мүмкіндіктерімен миллиондаған саяхатшыны баурап келеді. Осы өңірдің ең көрікті жері — Аланияда биыл наурыз айында «Alanya Ultra Trail» халықаралық жарысы жалауын желбіретеді. Тавр тауларының салқын баурайы мен көгілдір теңіз жағалауын бір арнаға тоғыстыратын бұл дода спорт сүйер қауым үшін көктемгі маусымның ең жарқын оқиғасы болмақ.
2017 жылдан бері дәстүрлі түрде өткізіліп келе жатқан бұл марафон Халықаралық трейлраннинг қауымдастығымен (ITRA) ресми түрде танылған. Биылғы жарыс «Дәстүрден трейлге» (Tradition to Trail) ұранымен ұйымдастырылуда. Марафонның басты ерекшелігі — оның бағыттары ерте кезден еркіндікті сүйген түрік көшпенділері, яғни йөрүктердің (Yörüks) тарихи көші-қон жолдарымен өтеді. Қатысушылар бір ғана жарыс барысында төрт мезгілдің ауа райын сезінуге бірегей мүмкіндік алады: Тавр тауларының қар басқан асқар шыңдарынан бастап, аты аңызға айналған Клеопатра жағажайына дейін созылатын жол көне керуен соқпақтары мен тарихи нысандарды басып өтеді.
Спортшыларға қашықтығы әртүрлі бес бағыт ұсынылады. Ең ұзыны — 68 шақырымдық Alanya Ultra Trail (AUT) болса, табиғат пен тарихқа саяхат жасағысы келетіндер үшін 5 шақырымдық Alanya Castle Run (ACR) бағыты қарастырылған. Жарыс жолында атлеттер Дамлаташ үңгірін, Қызыл мұнараны (Kızıl Kule), ежелгі кеме жасау зауыты Терсханені және ЮНЕСКО тізіміне үміткер Алания қамалын көре алады. Спорттық додадан кейін Аланияның бай асханасынан дәм тату — бөлек бір ғанибет. Теңіз өнімдері мен жергілікті «пияздар» (ақ бұршақ салаты) күш-қуатты қалпына келтіруге көмектеседі. Күн батқаннан кейін Аланияның түнгі өмірі жанданып, жағалаудағы жанды музыка мен мерекелік көңіл-күй саяхатшыларға ұмытылмас әсер сыйлайды.
