ТҮРКІСТАН ОБЛЫСЫНДА 5000 БАСҚА АРНАЛҒАН ЗАМАНАУИ ЕТ КОМБИНАТЫ МЕН АСЫРАУ АЛАҢЫ ІСКЕ ҚОСЫЛДЫ
Ауыл шаруашылығы – Түркістан облысы экономикасының басты тіректерінің бірі. Бұл салада іске асырылып жатқан ірі инвестициялық жобалар ауыл тұрғындарының әл-ауқатын арттыруға, өңірдегі өндірісті ұлғайтуға, экспорттық әлеуетті кеңейтуге зор серпін беруде. Соның айғағы ретінде Сайрам ауданы, Ақсукент ауылында іске қосылған заманауи ет комбинаты мен ірі қара малға арналған бордақылау алаңын айтуға болады.
Аталған жоба – «KAZ ECO MEAT» жауапкершілігі шектеулі серіктестігіне тиесілі. Озық технологиялармен жабдықталған бордақылау кешенінің қуаттылығы – 5000 бас ірі қара мал. Кешеннің жалпы құны – 8,5 млрд теңге. Жоба аясында жылына 5000 бас мал сойылып, 10 000 тоннаға дейін ет өңделеді деп жоспарланып отыр.
Ашылу салтанатына Түркістан облысының әкімі Нұрәлхан Көшеров арнайы қатысып, өндірістік нысанды аралап көрді. Аймақ басшысы өңдеу цехтары мен арнайы құрылған қанды жинау, сүйекті өңдеу жүйелерімен танысып, бұл жобаның тек ішкі нарыққа ғана емес, шетелге де өнім экспорттау әлеуеті зор екенін атап өтті. Ол сондай-ақ кәсіпорын басшылығына өндірісті толық қуатқа шығарып, экспорт көлемін арттыру жөнінде нақты тапсырмалар берді.
ӨНІМНІҢ БӘСЕКЕГЕ ҚАБІЛЕТТІЛІГІ ЖОҒАРЫ
«KAZ ECO MEAT» кешені 13 гектар аумақта орналасқан. Жүзге жуық адамды жұмыспен қамтитын өндіріс ошағына қажетті технологиялар Беларусь, Қытай және Түркиядан жеткізілген. Ең басты ерекшеліктерінің бірі – автоматтандырылған жем беру жүйесі мен малдың қалдықтарын өңдейтін экологиялық таза жабдықтардың қолданылуы. Қан өнімдерін жинау мен өңдеу арқылы биологиялық өнім өндіру көзделіп отыр. Бұл – толықтай қалдықсыз өндіріс қағидатымен жұмыс істейтін кәсіпорын.
Малдың сүйегі де өңделіп, одан әртүрлі техникалық және ауыл шаруашылығы өнімдері шығарылатын болады. Бұл бағыт – агроөнеркәсіптік кешеннің заманауи дамуындағы маңызды бағыттардың бірі болып саналады.
МАЛ ШАРУАШЫЛЫҒЫНА ҚОЛДАУ – АУЫЛ АМАНАТЫНЫҢ АЯСЫНДА
Аталған жоба «Ауыл аманаты» жобасы аясындағы бастамалармен сабақтас келеді. Себебі мұнда пайдаланылатын мал басы жергілікті фермерлерден және солтүстік облыстардан жеткізіледі. Бұл өз кезегінде өңірлік фермерлік шаруашылықтардың дамуына оң ықпал етеді. Бордақылау кешенімен тығыз қарым-қатынас орнатқан ауыл шаруашылығы тауар өндірушілері өз өнімдерін тиімді өткізе отырып, табысын арттырып отыр.
КОМБИКОРМ ЗАУЫТЫ – ӨҢІРДЕГІ ЕКІНШІ ҚАДАМ
Сол күні облыс әкімі Манкент ауылындағы «NURYM GROUP» ЖШС-нің заманауи жем өндіру зауытына да барды. Аталған жоба құны – 2,2 млрд теңге. Зауыт сағатына 20 тоннаға дейін өнім шығарады және қазіргі таңда 12 адам тұрақты жұмыспен қамтылған. Бұл нысан толықтай жеке кәсіпкердің қаржысына салынған. 7,25 гектар жерге орналасқан кәсіпорында Түркиямен жасалған келісім негізінде орнатылған озық технологиялар пайдаланылады.
Кәсіпорын жанынан құрылған зертхана арқылы өндірістік процестер мен шикізат сапасы үнемі бақылауда. Бұл – ауыл шаруашылығы өндірісінің сенімді әрі тиімді тетігіне айналған. Мұндай өндіріс ошақтары алдағы уақытта өңірде агроиндустриялық кластер құруға жол ашады.
