Ұлттық аграрлық ғылыми-білім беру орталығының ғалымдары Қытайда тағылымдамадан өтті
«Қазақ мал шаруашылығы және жем-шөп өндіру ғылыми-зерттеу институты» ЖШС жем-шөп өндіру және жайылым бөлімінің ғылыми қызметкерлері «Дамушы елдер үшін шабындық жерлерді экологиялық қорғау және басқару» тақырыбы аясында ішкі Моңғолия аграрлық университетінің негізінде Қытай Халық Республикасында ғылыми тағылымдамадан өтті, деп хабарлайды BasAgro.kz.
Тәжірибе алмасуға келген отандық ғалымдар жайылымдық мал шаруашылығы саласында жиған білімімен және Қазақстанда қолданылатын әдістер мен практикалық технологиялармен бөлісті. Тәжірбие алмасудың негізгі бағыттарының бірі – Қытайдағы жайылымдық тұжырымдарды дамытып, кеңес беру, жайылым жүйелерін басқару және жетілдіру, сондай-ақ жайылым ресурстарының өндірістік әлеуетіне қоршаған ортаның әсерін зерттеу. Қатысушылар сонымен қатар жайылымдық мал шаруашылығын басқарудың тұрақты жүйесін талқылады, бұл дамушы экономикалардағы аграрлық секторды ілгерілетудің маңызды аспектісі екенін еске саламыз.
Іс-сапар аяқталғаннан кейін ғылыми қызметкерлер бағдарламаға қатысқандарын растайтын сертификаттармен марапатталды. Алынған білім мен тәжірибе Қазақстанда жайылымдық мал шаруашылығының тиімділігі мен тұрақтылығын арттыруға ықпал ететіні анық.
