Өңірде жасымықты өңдеуге арналған заманауи цех салу жөніндегі инвестициялық жоба жүзеге асырылуда. Жоба агроөнеркәсіптік кешеннің өңдеу саласын дамытуға, қосылған құны жоғары өнім өндіру көлемін арттыруға және өңірдің экспорттық әлеуетін нығайтуға бағытталған, деп хабарлайды Ақмола облысының әкімдігі.
Жобаның жалпы инвестиция көлемі 1,3 млрд теңгені құрайды. Қаржыландыру кәсіпорынның меншікті қаражаты есебінен жүзеге асырылады.
Жаңа өндірістік нысанның қуаттылығы сағатына 5 тонна өнім өңдеуге мүмкіндік береді. Жобаны іске асыру ауыл шаруашылығы шикізатын өңдеу мүмкіндіктерін едәуір кеңейтіп, өндірілген өнімді тиімді пайдалануға жол ашады және өңірдегі агробизнестің дамуына қосымша серпін береді.
Өндірістік желіні 2026 жылдың қыркүйек айында іске қосу жоспарланған.
Кәсіпорынды одан әрі дамыту аясында сыйымдылығы 14 мың тонна болатын заманауи көкөніс сақтау қоймасын салу да көзделген. Нысанды пайдалануға беру алдағы жылға жоспарланып отыр.
