Жаңалықтар

Қызылорда облысында алғаш рет африкалық түйеқұс шаруашылығы ашылмақ

Сыр елін африкалық түйеқұс та жерсінді. Тұрқы бөлек, құстың ішіндегі ең ірі қанаттының 100 басы бірер айда жеткізілуге тиіс, деп хабарлайды basagro.kz Хабар24-ке сілтеме жасап.

Сөйтіп, Қызылорда облысында алғаш рет африкалық түйеқұс шаруашылығы ашылмақ. Құстың біразы Сырдария ауданының Бесарық ауылына бұған дейін де жеткізілген.

80 келіге дейін ет беретін африкалық түйеқұстың 12-сі бірінші лекпен Бесарыққа жеткізілді. Әзірге бірнеше күн карантинде тұрады. Кейін арнайы салынып жатқан қоражайда 100 түйеқұс күтімге алынып, инкубатор арқылы екі есеге дейін көбейтілмек. Басты мақсат – еті мен жұмыртқасын өндіріп, ішкі және шетелдің нарығына шығару.

– Етінің бағасы шамамен 1 келісі – 7 мың-12 мың теңге арасында. Сұранысқа байланысты. Жұмыртқасының бағасы – 3-5 мың аралығында. 1 жұмыртқасының салмағы 2,5 келіден 4 келіге дейін болады, – деді еріктестік директорының орынбасары Жасұлан Әбдірашитұлы.

1 аналығынан маусымына 50-60 дана жұмыртқа алуға болады екен. Әр дана жұмыртқа 3-5 мың теңге аралығында саудаланады. Түйеқұс Сыр өңірінің қатаң климатына тез бейімделеді, – дейді мамандар.

Өйткені ыстық пен суыққа төзімді келеді екен. Азық талғамайды. Кәдімгі төрт түлікке беретін жоңышқа мен құрама жемді сүйсініп жеп тұр.

Бұл жоба ойдағыдай жүзеге асса, қосымша 10 тұрақты жұмыс орны ашылады. Жалпы, ауданда өткен жылы кәсіпкерлікті дамыту аясында 450 адам жұмыспен қамтылған. Барлығы 500 жобаға мемлекет тарапынан 3 млрд теңге қаржылай қолдау жасалған. Бұл жұмыстар биыл да жалғасын табады.

– Құны 3 млрд теңгені құрайтын жобалар тізімін жасақтадық. Оның ішінде ауданымыз аграрлық сала болғанмен де, өңдеу өнеркәсібі, қызмет көрсету саласына басымдық беріп отырмыз, деп хабарлады Сырдария аудандық кәсіпкерлік, өнеркәсіп және туризм бөлімінің басшысы Алмат Сәдуақасов.

Айта кетейік, Сырдария ауданы бойынша шағын және орта кәсіпкерлік саны 3 мыңға жуықтаған. Соңғы бір жыл көлемінде бұл көрсеткіш 19%-ке артқан.

Басқа жаңалықтар

Back to top button