Ұлытау облысында автокөлік иелеріне қолайлы жағдай жасауға және мемлекеттік қызметтердің қолжетімділігі мен сапасын арттыруға бағытталған маңызды инфрақұрылымдық жобалардың бірі – мамандандырылған халыққа қызмет көрсету орталығы мен автодром құрылысы болып табылады. Аталған нысандардың құрылысы биыл толық аяқталып, пайдалануға беріледі деп жоспарлануда.
Бұл туралы Ұлытау облысының өңірлік коммуникациялар қызметі алаңында өткен баспасөз брифингінде облыстық құрылыс, сәулет және қала құрылысы басқармасының басшысы Ринат Алматов мәлімдеді. Оның айтуынша, жоба өңір тұрғындары үшін көлікке қатысты мемлекеттік қызметтерді алу процесін жеңілдетуге, сондай-ақ жүргізуші куәлігін алу және тәжірибелік дайындық сапасын арттыруға бағытталған.
Бұған дейін құрылыс жұмыстары жоспарланған мерзімде толық аяқталмай, мердігер ұйымның өз міндеттемелерін тиісінше орындамауына байланысты ол жосықсыз деп танылған болатын. Осыған орай, заң талаптарына сәйкес қолданыстағы келісімшарт бұзылып, жобаны жалғастыру үшін жаңа мердігер ұйым анықталды. Қазіргі таңда барлық қажетті рұқсат құжаттары рәсімделіп, құрылыс жұмыстары қайта жанданды.
Бүгінде нысанда құрылыс-монтаж жұмыстары кезең-кезеңімен белсенді түрде жүргізілуде. Автодром аумағында жолақтарды белгілеу жұмыстары толық аяқталып, тәжірибелік жүргізу алаңының негізгі инфрақұрылымы дайындалды. Сонымен қатар, әкімшілік ғимараттар мен қызмет көрсету аймақтарын жабдықтау, инженерлік желілерді тарту және аумақты абаттандыру жұмыстары қатар жүзеге асырылуда.
Жобаның ерекшелігі – мамандандырылған халыққа қызмет көрсету орталығы мен автодромның бір кешен ретінде жұмыс істеуі. Бұл азаматтарға мемлекеттік қызметтерді бір жерде алуына мүмкіндік беріп, уақыт үнемдеуге және қызмет көрсету сапасын арттыруға жағдай жасайды. Сонымен қатар, жүргізушілерді даярлау және емтихан тапсыру процесі заманауи талаптарға сай ұйымдастырылатын болады.
Аталған инфрақұрылымдық жоба өңірдегі цифрландыру және мемлекеттік қызметтерді жетілдіру бағытындағы жұмыстардың маңызды бөлігі болып табылады. Оның іске қосылуы автокөлік иелері үшін ғана емес, жалпы тұрғындар үшін де қолайлы орта қалыптастырып, әкімшілік рәсімдерді барынша оңтайландыруға ықпал етеді.
Сондай-ақ, жаңа орталықтың ашылуы өңірдегі қызмет көрсету саласының дамуына серпін беріп, азаматтардың мемлекеттік органдармен өзара іс-қимылын жеңілдетеді. Бұл өз кезегінде ашықтықты арттырып, қызмет көрсету сапасын жаңа деңгейге көтеруге мүмкіндік береді.
Жалпы алғанда, мамандандырылған ХҚКО мен автодром құрылысының аяқталуы Ұлытау облысы үшін маңызды әлеуметтік-экономикалық жоба болып саналады. Ол халықтың күнделікті өміріне тікелей әсер етіп, мемлекеттік қызметтердің тиімділігін арттыруға және өңірдің инфрақұрылымдық дамуына елеулі үлес қосады.
Bu gönderiyi Instagram’da gör
